Мемлекеттік рәміздер-халықтың рухы мен айбаты

Қазақстан Республикасы Тәуелсіздігінің 25 жылдығына орай Ақтоғай аудандық орталықтандырылған кітапханасында «Мемлекеттік рәміздер-халықтың рухы мен айбаты» атты дөңгелек үстел өтті.

Мақсаты: Рәміздердің пайда болуы және тарихтағы маңызы жайлы түсініктерді дамыту. Жастарды Отансүйгіштікке, адамгершілікке, Отанына, халқына адал қызмет етуге, елінің Туын, Елтаңбасын, Әнұранын қастерлеп, құрметтеуге, халқының тегін, тарихын білуге тәрбиелеу.

Көрнекілігі: Презентация, видеоролик, сауалнама, «Менің елімнің рәміздері» атты кітап көрмесі.

Мемлекеттік Рәміздер – мемлекеттің тәуелсіздігін білдіретін символикалық айырым белгілері. Олар белгілі бір мағына берерлік өзара үйлесімде орналастырылған жанды-жансыз заттардың бейнелерінен құрастырылады. Мұндай бейнелер үйлесімінен мемлекеттің, елдің арман-мұраты, өзін-өзі түйсінуі көрініс береді. 
«Мемлекеттік рәміздер – бұл біздің мемлекетіміздің, біздің егемендігіміздің берік негізінің бірі.Олар Тәуелсіздіктің қасиетті біріктіруші образын білдіреді» деп елбасымыз айтқандай Мемлекеттік рәміздер тәуелсіздік нышаны ретінде ерекше қадірленіп, оларға биік мәртебе беріледі, сондықтан да мемлекет адамдарға мемлекеттік рәміздерді қастерлеуді парыз етеді. Олардың түр-түсі мен ресми қолданылу тәртібі Конституцияда немесе конституциялық заңда белгіленеді (бұл Мемлекеттік Рәміздерге биік мәртебе береді) және заңмен қорғалады. Мемлекеттік рәміздерді қадірлеу азаматтардың мемлекет тәуелсіздігін құрметтеуді нығайтып, жасөспірімдердің отансүйгіштік сезімін қалыптастырады. 
Осы мақсатта өткізілген шарада Мемлекеттік Рәміздердердің тарихи негіздері туралы, Қазақстан Республикасының Мемлекеттiк Елтаңбасы, Қазақстан Республикасының Мемлекеттiк Туы, Қазақстан Республикасының Мемлекеттік Әнұраны, Мемлекеттік Рәміздердің қорланбауы туралы, Мемлекеттік Рәміздерді жасаушыларға қойылатын талаптар жайлы және өзгеде маңызды мәселерге қатысты пікір алмасып, өз ойларымен бөлісті. Оқырмандарға сауалнама таратылып, Мемлекеттік нышандар жайлы білім деңгейлеріне маркетингтік зерттеу жүргізілді.